ნანა ლობჟანიძე - ეს სიყვარული...

აკადემიური წიგნი, 2023, 120 გვ.

ISBN: 978-9941-9762-7-8

წინათქმა

სადღაც, შორს, დაფრინავენ სტრიქონები... ისინი ქარს ადევნებულ ფოთლებს ჰგვანან, წლების სიმძიმე რომ არ ეხებათ და დრო რომ არ აბერებთ... მსუბუქად ტრიალებენ, ზეცას ასკდებიან, მერე ისევ ძირს ეშვებიან ფურცლებს ეკვრიან და აკვდებიან...

მიფრინავენ წამები, წუთები, დღეები, წლები... და დრო გადის, მიფრინავს...

მე მუდამ შეყვარებული,

ველად გვირილებს ვკრეფდი,

და ნისლებს მიფარებული,

ჩუმ-ჩუმად ლექსებს ვწერდი.

უბით დამქონდა გრანელის

პატარა ჩიტის სევდა

და უიტმანი ჩემს გზებზე,

ბალახის ფოთლებს ფენდა....

... რა სჭირს სიყვარულს შესაბრალისი?

შესაცოდები რა აქვს ღირსებას?!

ბედნიერია ვინაც განიცდის,

ამ უსაშველო თავდავიწყებას...

ნანა ლობჟანიძე

`ყველას რაღაცა აქვს სახსოვარი - ბრძანებს პოეტი, ყველა რაღაცას ესათუთება. არიან ქალბატონები, რომელთა ყველაზე ლამაზი სამკაული სიტყვაა, სულის ღადარში გამოტარებული პოეტური სიტყვა. სიტყვა, რომელიც თითქოს ყოველდღიურმა ცხოვრებამ, ოჯახზე ზრუნვამ, სამსახურზე ფიქრმა, წარსულზე დარდმა, მომავალზე ფორიაქმა დაგავიწყა და მაინც არ გასვენებს ეს დალოცვილი, სულში წრიალებს და ლექსად ქცევას ითხოვს.

... თურმე ოცნებას არა აქვს ბოლო,

არც წლებს ამძიმებს სიბერის ფარდა,

გულში სიმშვიდე ბატონობს მხოლოდ

და სინანულით ძველ დღეებს ქარგავს.

მოქარგავს ფერად ფერებით ბწკარებს,

მერე მოავლებს ნაცრისფერ ვოალს,

ქვეშ მიაქარგავს ძირს დახრილ თვალებს,

ძაფს შეაწყვეტს და სიჩუმე მოაქვს.

მშვენიერი ქალბატონი, ნანა ლობჟანიძე, დღეს `სიტყვის სახლის“ დიასახლისია. პირველი პოეტური კრებულის „ეს სიყვარული...~“ ავტორი.

მობრძანდით,

წამით სული სინათლით აივსეთ,

გული მოგონებებით და სიყვარულით...

აქ თითოეული ლექსი სიწმინდითაა სავსე.

მობრძანდით, მკითხველო!

კეთილი იყოს თქვენი ფეხი `სიტყვის სასახლეში”.

მაყვალა გონაშვილი