იმან ჰუმაიდანი – სხვა ცხოვრებანი

აკადემიური წიგნი, 2021

204 გვ, ISBN: 978-9941-9695-9-1

წიგნი გამოიცა მწერალთა სახლის მხარდაჭერით

არაბულიდან თარგმნა დარეჯან გარდავაძემ

იმან ჰუმაიდანის "სხვა ცხოვრებანი"

რომანის პროტაგონისტი მირიამი ლიბანის სამოქალაქო ომს გარიდებული ახალგაზრდა ქალია, რომლის ოჯახმაც შვილის, მირიამის უმცროსი ძმის, ტრაგიკულად დაღუპვის შემდეგ ქვეყანა დატოვა და ავსტრალიაში ჰპოვა თავშესაფარი. მირიამისთვის ემიგრაციის თხუთმეტი წელი ავსტრალიასა და კენიას შორის გადაადგილებებში შეუმჩნევლად გავიდა, თუმცა მძიმე წარსული მის ხსოვნას ყველგან მოუცილებლად სდევდა თან. ეს წარსული მისი ოჯახის კოლექტიური წარსულია - მძიმე ტკივილგადატანილი ადამიანების ტრაგიკული ამბავი...

ლიბანის დევნილთა და ადგილმონაცვლე პირთა სამინისტროს შეტყობინებამ ბეირუთში მათი საოჯახო სახლის დაბრუნების შესახებ მირიამს სამშობლოში გამგზავრების გადაწყვეტილება მიაღებინა. 

გზად აეროპორტში ის გაიცნობს ამერიკიდან ლიბანში ფესვების საძებნელად ჩამოსულ მამით პალესტინელ და დედით ლიბანელ ნურს, რომელსაც პალესტინასა და ლიბანში გატარებული ადრეული ბავშვობა თითქმის დავიწყებული აქვს და ვეღარაფერს იხსენებს, აღმოსავლური კერძების სურნელებების გარდა. ნურიც თავისი წარსულის მოსაძებნად ბრუნდება ახლო აღმოსავლეთში. საკუთარი ადგილის ძიებაში ისეთი განცდა აქვს, რომ არცერთ ადგილს არ ეკუთვნის - არც ბავშვობის ქვეყნებშია მისი ადგილი და არც იმ ქვეყანაში, სადაც გაიზარდა.

თვითძიება კიდევ უფრო მეტ უპასუხოდ დარჩენილ კითხვებს უჩენს ორივეს, მეტ უცხოობასა და მარტოსულობას აგრძნობინებს, ეგზისტენციალურ შფოთვას უმძაფრებს. 

ომი დამთავრდა, მაგრამ ომის ისტორიები ჯერაც არ დასრულებულა! - ეს თანამედროვე ლიბანელი მწერალი ქალის, იმან ჰუმაიდანის, საყვარელი დასასრულია, როცა რომანი მთავრდება, მაგრამ სათხრობი არა და ავტორი მკითხველს მოლოდინს უქმნის, რომ მონათხრობს მიღმა დარჩენილი ისტორიები აუცილებლად გაგრძელდება.